పాట నెం :60

పల్లవి :-

 గుండెను గాయం చేసి బండగా మారావా
ఇబ్బంది నువ్వూ పడుతూ తబ్బిబ్బయ్యావా  //గుండె //

కలలోనైనా కావ్యాన్ని చదివేస్తావు నాలా
ఇలలో నీ ముందుంటే బేలచూపులు ఏలా ?
నీతో గడిపిన  సావాసాన్ని చంపేస్తున్నావా
నాలో జ్వాలను రగిలించి జారిపోతావా     //గుండె //


చరణం 1:

ఆ చినుకే చెప్పింది మన నడకల గమనాన్ని
ఆ మేఘం చూసింది మన వలపుల గమకాన్ని

మన మనసులు మమేకమై రుచి చూసిన ప్రణయాన్ని
మరలా వద్దకు రావొద్దంటూ నిందించకు నా ప్రేమని

నీవే నేనై నేనే నీవై నాలో సగమై నిలచిన ప్రాణమా  //గుండె //


చరణం 2:

ఆ చిరుగాలి పాడింది తన స్వరాన్ని శృతి కలిపి
ఆ సెలయేరు పారింది మన సవ్వడితో కలిసి

మన హృదయం సరాగమై కురిసిందే అనురాగమే
నువ్వూ ఓ దూరమై మిగిలిందే ఆలాపనే


నీవే నేనై నేనే నీవై నాలో సగమై నిలచిన ప్రాణమా  //గుండె //

పాట నెం :59 (పేరడీ సాంగ్ )

సినిమా : ఖైదీ నెం -150
పాట : నీరు నీరు నీరు 

చారు చారు చారు
ఇది చింతపండు చారు
తాగకుండా ఉండేదెవ్వరూ
చింతపండు కలిపా
కరేపాకు నలిపా
రుచి చూడకుండా పోయేదెవ్వరూ
వండేవాడి గోడు
ఎవడు వింటాడు
ఆలోచించే  నాధుడెవ్వరు


చారు చారు చారు
ఇది చింతపండు చారు
తాగకుండా ఉండేదెవ్వరూ

గొంతు గరగర మంటే పేగు పెరపెర మంటే
ఈ కొత్త చారునారగించవోయ్
నీళ్లు లేకపోతే .... ఒళ్లు నీరు గారిపోతే
ఈ చారు కాస్త చప్పరించవోయ్
ముద్దపప్పు తోటి
సుష్టిగా నువ్వు తింటే
ఆ పూటంతా గుప్పుగుప్పునా


చారు చారు చారు
ఇది చింతపండు చారు
తాగకుండా ఉండేదెవ్వరూ
చింతపండు కలిపా
కరేపాకు నలిపా
రుచి చూడకుండా పోయేదెవ్వరూ
వండేవాడి గోడు
ఎవడు వింటాడు
ఆలోచించే  నాధుడెవ్వరు